DKBA နိုင်ငံရေး လုပ်ရန် ပြင်ဆင်

တိုးတက်သော ဗုဒ္ဓဘာသာ ကရင် အမျိုးသား တပ်မတော် (DKBA)က အနာဂတ်တွင် နိုင်ငံရေးလုပ်ငန်းစဉ်များ လုပ်ဆောင် နိုင်ရန် ရည်ရွယ်၍ ကလို့ထူးဘော ကရင်အစည်းအရုံး Klo Htoo Baw Karen Organization (KKO)ဟု ဖွဲ့စည်းလိုက်ပြီ ဖြစ်ကြောင်း သိရ သည်။
၂၀၁၀ သြဂုတ်လ အတွင်းက ကရင်ပြည်နယ် မြ၀တီ ခရိုင်၌ ဖွဲ့စည်းသည့် DKBA နယ်ခြားစောင့်တပ် အခမ်းအနား(ဓာတ်ပုံ - ဧရာဝတီ)
KKO ဖွဲ့စည်းခြင်းကို ယခုလ ၁ ရက်နှင့်၂ ရက်နေ့က ကရင်ပြည်နယ် မြ၀တီမြို့နယ် ဆုံဆည်းမြိုင်ကျေးရွာ သူးမွဲခီး ဘုန်းတော်ကြီး ကျောင်းတွင် ညီလာခံခေါ်ယူ၍ ကျင်းပခဲ့ခြင်းဖြစ်ကြောင်း၊ KKO ဖွဲ့စည်းပုံ အခြေခံဥပဒေအရ ကာကွယ်ရေးဌာန၊ နိုင်ငံခြားရေး ဌာန၊ ကျန်းမာရေး၊ စီးးပွားရေး၊ ပညာရေး အပါအ၀င် စုစုပေါင်းဌာန ၁၄ ခု ပါရှိမည်ဖြစ်ကြောင်း KKO တွဲဖက်အတွေင်းရေးမှူး ၂ စောလုံ့လုံ က ပြောသည်။
“ရည်ရွယ်ချက်ကတော့ ကလို့ထူးဘောတပ်က တပ်အနေနဲ့ပဲရှိတာ၊ နိုင်ငံရေးအဖွဲ့အစည်း တရပ်အနေနဲ့ တွဲပြီးလုပ်ဖို့လိုအပ်တာပေါ့။ အဲဒါကြောင့် တပ်ကနေပြီး ဦးဆောင်ပြီးတော့ လူထုအစည်းအဝေးခေါ်ပြီး ဆန္ဒသဘောထားမေးမြန်းပြီးတော့ ဆောင်ရွက်လိုက်တာ ပါ”ဟု စောလုံ့လုံ က ဧရာဝတီသို့ ပြောသည်။
KKO ကို ဥက္ကဌ အဖြစ် မန်းရောဘတ် ဘဇန် ၊ ဒု ဥက္ကဌ ဗိုလ်မှူးချုပ် စောမိုရှေး၊ အထွေထွေ အတွင်းရေးမှူး စောဂုဏ်အောင်၊ တွဲဖက် အတွင်းရေးမှူး (၁) နော်ကော်သူးလေ လားဖော၊ တွဲဖက်အတွင်းရေးမှူး (၂) စောလုံ့လုံ တို့ အပါအ၀င် ဌာနဆိုင်ရာ တာဝန်ခံ ၁၄ ဦးဖြင့် ရွေးချယ်ဖွဲ့စည်းထားသည်။
KKO က နိုင်ငံရေးအရ စေ့စပ်ညှိနိုင်းလုပ်ဆောင်မှုများကို ကိုင်တွယ်ဆောင်ရွက်သွားမည်ဖြစ်ပြီး DKBA ကို စစ်ဦးစီးချုပ် ဗိုလ်ချုပ် စောလားပွယ် ခေါ် ဗိုလ်နှုတ်ခမ်းမွေး က ဦးဆောင်ကာ လက်နက်ကိုင်အဖွဲ့အဖြစ် ဆက်လက်တည်ရှိနေမည် ဖြစ်သည်။
နိုင်ငံရေးအဖွဲ့အဖြစ် ဖွဲ့စည်းထားသော KKO က ၂၀၁၅ တွင်ကျင်းပမည့် ရွေးကောက်ပွဲတွင် ဝင်ရောက်ရွေးချယ်ခံနိုင်ဖွယ် ရှိကြောင်းနှင့် ကြားကာလတွင် ကရင်အမျိုးသားအစည်းအရုံး(KNU) သို့မဟုတ် မတူကွဲပြားသော ကရင်အဖွဲ့အစည်းများနှင့် ပြန်လည်ပေါင်း စည်း နိုင်ရန် အခြေအနေများလည်း ရှိကြောင်း စောလုံ့လုံ က ပြောသည်။
“DKBA ကတော့ ရှိနေဦးမှာပဲ။ ကျနော်တို့ KKO ကတော့ ကြားကာလထဲမှာ အခြေအနေတွေက ကောင်းလာမယ်ဆိုရင် ကျနော်တို့အနေနဲ့ ပါတီဝင်ကောင်း ဝင်နိုင်ပါတယ်”ဟု သူက ပြောသည်။
DKBA သည် ယခင်နှစ် နိုဝင်္ဘာ လဆန်းပိုင်းက ဘားအံမြို့ရှိ ကရင်ပြည်နယ် ဝန်ကြီးချုပ်ရုံးတွင် နှစ်ဘက် အပစ်ခတ်ရပ်စဲရေး သဘော တူ လက်မှတ်ရေးထိုးထားပြီး ဖြစ်သည်။
KKO သည် KNU အား မိခင်အဖွဲ့အစည်းအဖြစ်ခံယူပြီး ဝန်းရံသည့် အဖွဲ့အစည်းဖြစ်ကြောင်း၊ တန်းတူရေးနှင့် ကိုယ်ပိုင်ပြဌာန်းခွင့်ရရှိရေး၊ အမျိုးသားစည်းလုံးညီညွှတ်ရေးနှင့် ဖွံ့ဖြိုးတိုးတက်ရေး၊ ဖက်ဒရယ်ပြည်ထောင်စု တည်ဆောက်ရေးနှင့် ထာဝရငြိမ်းချမ်းရေးတို့အတွက် အကောင်ထည်ဖော် လုပ်ကိုင်သွားမည်ဟု KKO ထုတ်ပြန်ချက်တွင် တွေ့ရှိရသည်။
KKO ဖွဲ့စည်းရန်ပြုလုပ်သော ညီလာခံကို DKBA စစ်ဦးစီးချုပ် ဗိုလ်ချုပ်စောလားပွယ်၊ KNU မှ ဗိုလ်မှူး နဒါးမြ၊ ရှမ်းပြည်တပ်မတော် မြောက်ပိုင်း (SSA-N) မှ တာဝန်ရှိသူများ၊ ဗုဒ္ဓဘာသာနှင့် ခရစ်ယာန် ဆရာတော်များ အပါအဝင် ဒေသခံ ၅၀၀ ကျော် တက်ရောက် ကြောင်း သိရသည်။
ထို့အတူ ထိုင်း-မြန်မာအခြေစိုက် အဖွဲ့များဖြစ်သော မြန်မာနိုင်ငံအလုပ်သမားသမဂ္ဂများ အဖွဲ့ချုပ်(FTUB)၊ ပြည်ထောင်စု မြန်မာနိုင်ငံ အမျိုးသားကောင်စီ(NCUB)၊ အမျိုးသား ဒီမိုကရေစီ အဖွဲ့ချုပ်(လွတ်မြောက်နယ်မြေ) (NLD-LA)၊ မြန်မာနိုင်ငံ ရှေ့နေများ ကောင်စီ (BLC)၊ ရခိုင်ပြည်လုံးဆိုင်ရာ ကျောင်းသားနှင့် လူငယ်များအစည်းအရုံး(AASYC) တို့မှ တာဝန်ရှိသူများလည်း တက်ရောက် ခဲ့ကြ သည်။
KNU နှင့် DKBA တို့သည် ခွဲထွက်ပြီး ၁၇ နှစ်အကြာ ယခုနှစ် မတ်လ လဆန်းပိုင်းတွင် ပထမဆုံး အကြိမ်အဖြစ် နှစ်ဖွဲ့ ခေါင်းဆောင် များ အကြား သမိုင်းဝင်တွေ့ဆုံခဲ့ကြပြီး အတိတ်ကာလအငြိုးအတေးများကို ချေဖျက်ကာ အနာဂတ်တွင် နိုင်ငံရေး၊ စစ်ရေးနှင့် နယ် မြေ ဖွံ့ဖြိုးရေးတို့တွင် ညှိနှိုင်း လုပ်ဆောင်သွားကြရန်သဘောတူ ဆွေးနွေးမှုများ ပြုလုပ်ခဲ့ကြသည်။
DKBA သည် ၁၉၉၅ တွင် မိခင်အဖွဲ့အစည်းဖြစ်သော KNU မှ ခွဲထွက်ခဲ့ပြီး အစိုးရနှင့်ပူးပေါင်းကာ KNU ကိုပြန်လည်တိုက်ခိုက် ခဲ့ သည်။ KNU မှ ခွဲထွက်လာသည့် အဖွဲ့များအနက် အင်အားအကြီးဆုံးအဖွဲ့လည်း ဖြစ်သည်။
၁၉၉၅ ခုနှစ်ထဲတွင်ပင် ယခင်စစ်အစိုးရနှင့် အပစ်ခတ်ရပ်စဲရေး စာချုပ် ချုပ်ခဲ့သော်လည်း၂၀၁၀ ရွေးကောက်ပွဲမတိုင်မီတွင် အစိုးရ က နယ်ခြေားစောင့်တပ် အသွင်ပြောင်းမှုကို ဗိုလ်ချုပ် စောလားပွယ် ဦးဆောင်သော DKBA တပ်မဟာ ၅ က လက်မခံခဲ့သဖြင့် ငြိမ်း ချမ်းရေး ပျက်ပြားကာ အစိုးရနှင့် တိုက်ပွဲ ပြန်ဖြစ်ခဲ့သည်။
DKBA နယ်ခြားစောင့်တပ် ဖွဲ့စည်းခြင်း အခမ်းအနားများကို ၂၀၁၀ ပြည့် သြဂုတ်လ အတွင်းက လှိုင်းဘွဲ့မြို့နယ် မြိုင်ကြီးငူ ဒေသ၊ ပိုင်ကျုံမြို့နယ် ထန်းတပင်ကျေးရွာ၊ မြ၀တီ မြို့နယ် မဲပလဲ့ဒေသ၊ ကော့ကရိတ်မြို့နယ် ထီးဟူးသံ ကျေးရွာနှင့် ကွင်းကလေးဒေသ များတွင် ယခင်စစ်အစိုးရကဦးဆောင် ပြုလုပ်ခဲ့သည်။

ဧရာဝတီမှ ကူးယူသည်။
These icons link to social bookmarking sites where readers can share and discover new web pages.
  • Digg
  • Sphinn
  • del.icio.us
  • Facebook
  • Mixx
  • Google
  • Furl
  • Reddit
  • Spurl
  • StumbleUpon
  • Technorati

Leave a comment

Join Free