သိမ်းဆည်းလယ်မြေအတွက် နစ်နာကြေးရရေး KNPP ကဆောင်ရွက်ပေးရန် တောင်းဆို ~ YaWai (ပိုင်စိုးသူ)

ကရင်နီ အမျိုးသား တိုးတက်ရေးပါတီ KNPP နှင့် ဒေသခံလူထုများတွေ့ဆုံ၍ လူထု၏ အမြင်များ အခက်အခဲများအား မေးမြန်းလျှက်ရှိရာ ဒေသခံလူထုများက၎င်းတို့ပိုင် လယ်ယာမြေများ သိမ်းဆည်းခံရမှုများတွင် ဆုံးရှုံးနစ်နာကြေးများ ပြန်ရဖို့ ဆောင်ရွက်ပေးပါရန် KNPP ပါတီအား တောင်းဆိုလိုက်ကြသည်။

၎င်းတို့ပိုင်လယ်များအား ကုမ္ပဏီများ ၊ အစိုးရစစ်တပ်နှင့် ၀န်ကြီးဋ္ဌာနများမှ သိမ်းယူခဲ့ရာတွင် လျော်ကြေး လုံးဝမရခြင်းသို့မဟုတ် ထိုက်တန်သည့် လျော်ကြေးမရရှိခြင်းတို့အတွက် ကရင်အမျိုးသား တိုးတက်ရေးပါတီက ဆောင်ရွက်ပေးဖို့ ဒေသခံများက ဆောင်းဆိုလိုက်ခြင်းဖြစ်သည်။

ဖရူဆိုမြို့နယ်တွင် ပြုလုပ်သည့် KNPP နှင့် ဒေသခံများတွေ့ဆုံပွဲတွင် ဒေသခံလူထုက ၎င်းတို့၏ လိုအပ်ချက် ခံစားချက်များကို တင်ပြနေသည့် ဒေသခံ တဦး၊

လွိုင်ကော်မြို့နယ် နွားလ၀ိုးကျေးရွာမှ လယ်သမားကြီးတဦးက “သိမ်းယူတဲ့ လယ်တွေကို ကာလပေါက်ဈေးအတိုင်း လျှော်ကြေးပေးဖို့ တောင်သူတွေက အစားဖို့ပြန်ရဖို့ဆိုတာ ဘယ်လိုမှ မရရှိခဲ့ဘူး။ လက်ရှိအလုပ်လက်မဲ့ ဖြစ်သွားတဲ့ တောင်သူတွေကိုလည်း လယ်ယာအသစ် စိုက်ခင်းအသစ်ပြန်ပေးဖို့ အဲဒါတွေကို စီစဉ်ဆောင်ရွက်ပေးပါ” ဟု ယင်းကျေးရွာတွင် ပြုလုပ်သည့် တွေ့ဆုံပွဲ၌ ပြောဆိုသည်။

ယင်းနယ်မြေတွင် အစိုးရ တပ်ရင်းသစ်တည်ဆောက်မှုများ၊ အမြောက် တပ်ရင်း အမှတ် ၂၆၁ နှင့် ၂၅၁ တို့မှ တပ်နယ်မြေအဖြစ် လယ်မြေများအား သိမ်းယူခဲ့ခြင်းကြောင့် လယ်သမားများ၏ လယ်မြေများ ဆုံးရှုံးခဲ့ရခြင်းဖြစ်သည်။

အလားတူ ဒီးမော့ဆိုမြို့နယ် ဆိုဘောသဲကျေးရွာတွင် ပြုလုပ်သော KNPP နှင့်လူထုတွေ့ဆုံပွဲ၌လည်း လောပီတကျေးရွာအုပ်စုမှ ကိုဖိုးဗြဲက “လောကထုကျေးရွာ တိုးချဲ့ကျေးရွာအတွက် ကျနော်တို့ရဲ့ မြေပိုင်ရှင်၊ ခြံပိုင်ရှင်ရဲ့ နစ်နာကြေးကို အာဏာပိုင်တွေက အခုချိန်ထိ မပေးသေးဘူး။ အဲဒါတွေကို ကျနော်တို့က နစ်နာကြေးတောင်းပေမဲ့ ရပ်ကွက်လူကြီးက မပေးခဲ့ဘူး” ဟုပြောဆိုတင်ပြခဲ့သည်။

ထို့အပြင် တောင်သုံးလုံးအနီးရှိ ကြက်ဆူစိုက်ခင်းများ စိုက်ရာတွင်လည်း တောင်ယာမြေများ သိမ်းယူခဲ့ကြောင်း၊ စက်မှုဇုံအနေဖြင့် တည်ဆောက်ကြရာတွင်လည်း လျှော်ကြေးငွေ တန်ရာတန်ကြေး မရရှိခဲ့ကြောင်း၊ ဘိလပ်မြေစက်ရုံတည်ဆောက်မည့် နေရာတွင်လည်း အနည်းဆုံးကျေးရွာ ၂၀ အတွက် အခက်အခဲ ကြုံတွေ့နိုင်ကြောင်းကိုပါ တင်ပြခဲ့သည်။

ရပ်ကွက်အာဏာပိုင်များက ခြံပိုင်ရှင်များအတွက် နစ်နာကြေးပေးရန် တိုးချဲ့နေထိုင်လာသည့် လူနေအိမ်များထံမှ ငွေအကြိမ်ကြိမ် ကောက်ယူသော်လည်း ခြံပိုင်ရှင်များ အနေဖြင့် မရရှိကြသဖြင့် ပြည်နယ် ၀န်ကြီးများထံ အကူအညီတောင်းခံခဲ့သော်လည်း ထူးခြားမှုမရှိဟု ဒေသခံများက ရှင်းလင်းပြောဆိုကြသည်။

လောပီတရေအားလျှပ်စစ်မှ ရန်ကုန် ၊ နေပြည်တော်သို့ သွယ်တန်းသွားသော မဟာဓတ်အားလိုင်းများ ကြောင့်လည်း လောကထုကျေးရွာသားများ နေထိုင်ရာနေရာများ ဖယ်ရှားပေးရကာ အခြားနေရာများသို့ အိမ်ရာတိုးချဲ့လာရသည့် အဖြစ်အပျက်များလည်း ရှိသည်ဟု ဒေသခံများက ဆိုသည်။

ယင်းကဲ့သို့ လယ်ယာမြေများ သိမ်းဆည်းခံရသည့် နစ်နာမှုများအတွက် အစိုးရသို့မဟုတ် KNPP က ဖြေရှင်းပေးပါရန်၊ တရားမျှတသည့် အခွင့်အရေးရှိသည့် ဥပဒေများ ပေါ်ထွက်စေရန် ကျေးရွာလူထုက KNPP နှင့်တွေ့ဆုံစဉ် တောင်းဆိုလိုက်ကြခြင်းလည်းဖြစ်သည်။

လယ်ယာမြေ ဥပဒေနှင့် မြေလွတ်မြေလပ် မြေရိုင်းစီမံခန့်ခွဲခွင့် ဥပဒေတို့ကိုမတ်လ ၃၀ ရက်နေ့က ပြည်ထောင်စုလွှတ်တော်မှ အတည်ပြုလိုက်သော်လည်း ယင်းဥပဒေတွင် လယ်ယာမြေများ မသိမ်းယူနိုင်ရန် ကာကွယ်ပေးသည့် အချက်မပါရှိဟု လယ်သမားအရေးဆောင်ရွက်သူများနှင့် ဥပဒေပညာရှင်တချို့က ထောက်ပြပြောဆိုကြသည်။

သို့ရာတွင် ယင်းဥပဒေတွင် ပါရှိသည့် ကျေးရွာလယ်ယာမြေ စီမံခန့်ခွဲရေး အဖွဲ့များက လယ်သမားများ၏ မြေယာများ သိမ်းဆည်းမခံရအောင် ကာကွယ်နိုင်သည့် နည်းလမ်းများရှိသည်ဟုလည်း အချို့သော လွှတ်တော်ကိုယ်စားလှယ်များက ပြောဆိုသည်။ ။

YPI မှ ဖြစ်သည်။

These icons link to social bookmarking sites where readers can share and discover new web pages.