ပြည်ပနိုင်ငံသားခံ မြန်မာများ မြန်မာနိုင်ငံသားများအဖြစ် ပြန်လည်ခံယူရန် လျှောက်ထားမှုများရှိ ~ YaWai (ပိုင်စိုးသူ)

ပြည်ပနိုင်ငံသားအဖြစ် ခံယူထားသော မြန်မာများ မြန်မာနိုင်ငံသားအဖြစ် ပြန်လည်ခံယူလိုခြင်း လျှောက်ထားမှုများ ရှိလာသည့်အတွက် လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနမှ စိစစ်ပေးနေရမှုမှာ ၁၀ မှုခန့် ရှိနေပြီဖြစ်ကြောင်း သိရသည်။ ပြည်ပနိုင်ငံသားအဖြစ် ခံယူထားသူများအနေဖြင့် မြန်မာနိုင်ငံသားအဖြစ် ပြန်လည်လျှောက်ထားမှု ဆောင်ရွက်သည့်အခါတွင် သက်ဆိုင်ရာနိုင်ငံ မြန်မာသံရုံးမှတစ်ဆင့် အကြောင်းကြားပြီး နိုင်ငံခြားရေးဝန်ကြီးဌာနမှ ယင်းကို ပြန်လည်စစ်ဆေးကာ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနသို့ မြန်မာနိုင်ငံတွင် နေထိုင်ခဲ့ဖူးခြင်းရှိ မရှိ အစရှိသည်ဖြင့် စစ်ဆေးအတည်ပြုပြီးမှ နိုင်ငံခြားရေးဝန်ကြီးဌာနသို့ ပြန်လည်ပေးပို့ရခြင်းဖြစ်ကာ ယနေ့ချိန်ထိ ၁၀ မှုခန့် ရှိနေပြီဖြစ်ကြောင်း အဆိုပါဝန်ကြီးဌာနမှ တာဝန်ရှိသူတစ်ဦးက ပြောသည်။ “သမ္မတကြီး ဖိတ်ခေါ်ပြီးတဲ့ နောက်ပိုင်းကစပြီး ဒီလိုမျိုး မြန်မာနိုင်ငံသားအဖြစ် ပြန်လည်လျှောက်ထားလို့ နိုင်ငံခြားရေးဝန်ကြီးဌာနကတစ်ဆင့် စိစစ်ခိုင်းတာ ၁၀ မှုလောက်ရှိပါပြီ။ စိစစ်တယ်ဆိုတဲ့နေရာမှာ သူတို့ရဲ့ ကိုယ်တိုင်ရေးသား ခံဝန်ချက်တွေထဲမှာ ပါတဲ့အတိုင်း ဟုတ် မဟုတ်၊ အရင်သူတို့ပြောတဲ့ လိပ်စာမှာ တကယ်နေထိုင်မှုရှိ မရှိဆိုတာတွေ စစ်ဆေးပြီးတော့မှ အတည်ပြုပြီး နိုင်ငံခြားရေးဝန်ကြီးဌာနကို ပြန်တင်ရပါတယ်။ အဲဒီကမှတစ်ဆင့် သမ္မတရုံးကို ဆက်တင်ပြီး ခွင့်ပြုသင့်မသင့် ဆုံးဖြတ်တဲ့အတိုင်းပါပဲ” ဟု ယင်းက ဆိုသည်။ ယင်းအပြင် နိုင်ငံသားအဖြစ် ပြန်လည်ခံယူခွင့်ရရှိခဲ့သူများ ရှိပါကလည်း ယင်းတို့နေထိုင်ရာ ရပ်ကွက်တွင် အိမ်ထောင်စုစာရင်းနှင့် နိုင်ငံသားဖြစ်မှုပေါ် မူတည်၍ ဥပဒေကြောင်းအရ ရသင့်ရထိုက်သော နိုင်ငံသားစိစစ်ရေးကတ်ပြားကို ထုတ်ပေးနိုင်ရန်လည်း စီစဉ်ဆောင်ရွက်ထားကြောင်း သိရသည်။ “အရင်တုန်းက တခြားနိုင်ငံသားအဖြစ် ခံယူထားသူတွေကို ပြန်လျှောက်ခွင့် လုံးဝမပေးခဲ့ပါဘူး။ အခုမှ ပြန်လာပါ၊ လက်ခံတယ်ဆိုတဲ့ သမ္မတကြီးကြောင့်သာ ဒါကို ပြန်လုပ်ပေးတယ် ထင်ပါတယ်။ သို့သော်လဲပဲ ဥပဒေထဲမှာပါတဲ့ နိုင်ငံတော်အကျိုးငှာ ပြန်လက်ခံနိုင်တယ် ဆိုတာလဲပါတော့ ဒီ ၈၂ မြန်မာနိုင်ငံသား ဥပဒေအရပဲ လုပ်ကြတာ ဖြစ်ပါမယ်” ဟု ဥပဒေပညာရှင်တစ်ဦးက ယင်း၏အမြင်ကို ပြောခဲ့သည်။ ယင်းကဲ့သို့ နိုင်ငံသားအဖြစ် ပြန်လည်ခံယူလိုသည့် သူများအတွက် နိုင်ငံသားစိစစ်ရေးကတ်ပြား ထုတ်ပေးမှုကို ၁၉၈၂ ခုနှစ် မြန်မာနိုင်ငံသား ဥပဒေနှင့်အညီ ဆောင်ရွက်ပေးသွားမှာဖြစ်ပါသည်။

Myanmar Express

These icons link to social bookmarking sites where readers can share and discover new web pages.